中環出更：推酸菜味餅乾冇人吼 黃偉鴻嘆「跟得快好過創得快」
唔少人都覺得做生意最緊要有創意，敢於創新，不過本身做開零食生意嘅香港品牌發展局副主席黃偉鴻就有另一番體會。尋日佢出席品牌活動提及客人會對公司有啲乜嘢特別要求時，就自爆好耐以前試過推出酸菜味餅乾，點知最後就冇乜人買，呢件事令佢明白到創意係「跟得快好過創得快」嘅道理，依家佢都唔敢亂嚟喇。黃又話，諗住推出芝士同辣味魚皮，到時會賣番平啲同經濟啲咁話。芝士味同辣味食品都算大眾化，應該唔會再冇人買喇啩？
同場嘅仲有品牌局主席黃家和、香港中華廠商聯合會常務會董陳家偉（Calvin）、副會長陳國民。Calvin話，十幾歲時媽媽煲過芫茜皮蛋湯畀佢飲，佢仲一試就愛上芫茜，尋日仲即場向食物生產商行政總裁唐凱茜（Oicy）反映意見，話佢哋出產嘅「芫茜魚皮」味道唔夠。Oicy解釋，大家對芫茜嘅反應好極端，而且芫茜係一批批咁買返嚟，「有啲味道濃啲，有啲就冇咁濃」，所以喺控制味道同質量上有難度。Calvin又問對方會否推出芫茜魚蛋，Oicy就表示，整完出嚟最緊要係有人買。
有「家電大佬」之稱嘅陳國民話，其公司最近推出畀餐廳用嘅鐵板燒抽風枱，特別之處係內置淨化功能，而且完全唔使駁喉管。而依家愈來愈少人煮飯，甚至唔識煮飯，所以亦推出咗可自動炸薯條嘅產品，過程只需十幾分鐘。聽落都幾方便。
李慧芬：好睇客人口味
職場上相信唔少人都試過被客戶刁難，金紫荊女企業家協會執委李慧芬話，以前仲做設計嘅時候，有經營內衣嘅客人要求佢設計新產品，佢整咗五十多個設計版本，但最後全部被客人拒絕，佢認為唔一定要創新先得，都好睇客人口味咁話。
卓妮