中環出更：黃家和為環保儲廢物擺屋企
想環保，當然要「少棄置，多珍惜」，好多睇落冇用嘅物件，其實仍可再用。香港餐飲聯業協會會長黃家和尋日出席一個活動時講起，會保留一啲其他人視為廢物嘅物件，相信喺適當嘅時候可以再用，例如係外賣咖啡嘅紙杯咁，仲話係咁收收埋埋，屋企同辦公室睇落有啲似垃圾崗添，不過為咗環保，都係值得嘅。聽落都算幾大犧牲！
黃家和話，平時用完裝咖啡嘅外賣紙杯，唔捨得掉落垃圾桶，因為呢種紙杯質地堅固，可以繼續裝其他飲品，至於其他物件如汽水嘅塑膠水樽，或原子筆嘅筆桿，佢都盡量物盡其用，當去到唔可以再重用時就攞去回收箱，大嘆依家喺消費主義下，好多物品都係用完即棄，其實只要好好珍惜，聲稱只能用一次嘅物品，仍然可以用多幾次。
佢又話，為環境着想，應減少用化學品，自己已停止染髮多年，咁樣既免傷皮膚，又可保護水質，況且一頭銀髮，亦予人成熟同自然嘅觀感咁話。
蔡若蓮學「斷捨離」
同場又見到教育局副局長蔡若蓮，佢話，正努力學習「斷捨離」過簡樸生活，減少無謂嘅購物消費，又會將部分物品轉贈更有需要嘅人，覺得整理屋企後，雜物少咗，人都特別醒神。不過佢話，自己鍾意睇書，無法戒除買書嘅習慣，啲書愈積愈多，惟有將部分轉贈他人，或盡可能去圖書館借啦。
講起環保，其實冇咁熱，開少啲冷氣就可以節約能源啦。國際專業保險諮詢協會會長羅少雄話，明白到保險業嘅前線員工為顧及形象，酷暑之下仍要着西裝，確實辛苦。所以佢唔會硬性規定同事必須打領呔返工，覺得打呔係來自歐洲文化，未必適合亞洲嘅氣候，相信唔打呔，客戶都會明白可節省開冷氣嘅能源，會體諒佢哋嘅。
卓妮