政情：搞客家話圍頭話演唱會 梁志祥自言全港第一人
平時大家聽演唱會，粵語歌、國語歌、英文歌就聽得多，甚至韓文歌、日文歌都可能有聽過，但客家話同圍頭話歌又聽過未呢？立法會議員梁志祥（祥哥）就話曾經搞過客家話同圍頭話歌嘅演唱會，自言可能係全港第一個人搞呢兩種語言嘅演唱會添！
曾上堂學做義工
祥哥早前喺一個公開活動上講起自己做義工嘅經驗，話因為好鍾意幫人，所以早喺未從政時已經開始做義工喇，仲曾經好認真咁上過堂。做義工幫人都要上堂？佢話其實都係學習吓做義工時要留意嘅事項，例如對住小朋友或者係老人家，都會有唔同嘅溝通方式，亦都有學習如何去安排一個活動等。
祥哥話，好耐之前有朋友叫佢幫手搞活動，要搵一班人唱客家話同圍頭話嘅歌，點知搵搵吓，就愈來愈多人參與喇，後來仲搞埋演唱會添，相信當時係全港第一個唱客家話同圍頭話歌嘅演唱會，而之後喺西貢亦都有團體搞過多次類似嘅演唱會咁話。