政情:林正財「生命再動」 跳槽信義會

身兼行政會議成員嘅安老事務委員會主席林正財喺Facebook貼文話轉工。唔係啩?喺政府宣布暫緩修訂《逃犯條例》後,有政黨建議政府改組行政會議,唔通佢咁快郁身?

林正財真係轉工o架,但同行政會議就冇關,佢本身係基督教靈實協會行政總裁,而佢喺Facebook貼文,話轉咗工去信義會喎,仲話青年、中年、老年都要「生命再動」。佢竟然跳槽?就因為佢提到轉工,隨即惹起啲關注,有網民仲留言問:「幾時轉工?」另外亦都有網民話:「帶埋我吖」。

「只係做一日咋」

見到啲網民咁大反應,林正財都即刻解釋,話只係做一日咋!其實佢係幫信義會金齡薈手,見佢上載咗嘅相,有攝影師幫佢拍攝,睇嚟應該係幫手宣傳一啲活動嘞!其實呢個社企係服務金齡人士(五十歲或以上)、在職同社區人士,透過精心設計嘅活動,讓金齡人士一齊建構享受健康、豐盛、富意義嘅生活新模式,咁林正財一向專注對長者嘅服務,自然一拍即合,好樂意幫手喇。

第一手消息請下載on.cc東網iPhone/iPad/Android/Windows Phone Apps