政情：兒時洗太平地 麥瑞琼最叻搗亂
環境局推出嘅「大嘥鬼」深入民心，當年因清潔香港運動而生嘅「垃圾蟲」都係一代香港人嘅回憶。戶外燈光工作小組主席麥瑞琼尋日出席戶外燈光約章頒獎禮時，就講起細個時嘅全港清潔活動，話當時社會比較簡單，「垃圾蟲」推出之後，大家都即刻檢點啲，唔敢亂拋垃圾，又話當年有「洗太平地」活動，而佢最叻就係幫手「搗亂」喎。
謝展寰冇帶環保袋習慣
麥瑞琼話細個時有「洗太平地」活動，到時到候家家戶戶就會用「臭水」嚟抹地同抹木板床，以防止屋企有蝨，佢嗰陣都有幫手，不過係幫手搗亂，因為成日都倒瀉水喎。講起依家市民嘅環保意識高咗，佢就話自己都有自備環保袋同食物盒，仲話買個靚靚環保袋，自然就會好珍惜同成日用喇。佢仲話已經感染咗老公，老公依家都會記得出街時帶環保袋喇！
同場仲有環境局副局長謝展寰，被問到有冇帶環保袋出街嘅習慣，佢就話冇帶環保袋，但係就有用手巾仔喎。