政情：吳文華嘆立會秘書處好難捱
立法會近年因民主派同建制派爭拗不斷，喺議會拉布、衝擊事件屢次發生，立法會秘書處工作亦受影響，最近秘書處更因立法會秘書長陳維安被捲入《逃犯條例》修訂風波而被質疑中立性，真係雪上加霜。曾服務議會二十多年嘅立法會前秘書長吳文華（Pauline）都慨嘆依家嘅秘書處工作「好困難、好吃力」，比以往複雜咗好多，但就認為秘書處有好好嘅基礎，亦有好好嘅團隊，所以會應付到咁話。
相約劉慧卿拆蟹
卸任秘書長後嘅Pauline忙於搞社企之餘，熱愛美食嘅佢閒時亦會約吓朋友食飯。日前佢就同立法會前議員劉慧卿（卿姐）喺銅鑼灣一間餐廳拆蟹，鍾情海鮮嘅佢仲大讚碟避風糖炒辣蟹「好tempting（吸引）」添！Pauline話耐唔耐都會約卿姐食飯，因為兩人共事廿多年，而卿姐當年係好勤力嘅議員，所以秘書處同佢最多「溝通」。被問到兩人有冇試過嗌交，Pauline就笑住話︰「大家理論啫」，又話卿姐出任立法會行政管理委員會時都好體諒秘書處，幫咗秘書處好多咁話喎。
卓妮