會議時間將近，經理明哥剛巧看見強仔的背影，叫道：「強仔，一齊傾兩句等陣開會內容吖。」但強仔沒有半點反應。明哥上前拍一拍強仔的肩膀，他受驚回頭發現明哥，才大叫：「明哥，你嚇死我喇！」明哥頓感疑惑：「點解你聽唔到我叫你？」
強仔從耳中拿出耳塞說：「我就係知道噪音可導致耳鳴、聽力減退，嚴重更會導致永久性失聰，亦知道預防措施首要考慮盡量減低噪音來源啦，但我都不忘使用最後防線──耳塞去加強聽覺保護。」
明哥說：「你唔好『懶醒』住，雖然你清楚噪音嘅危害，但係你今次都忽略咗一個重點。其實選擇耳塞及耳罩，要視乎工作環境嘅噪音情況，要由合資格人士作出噪音風險評估後，先知道購買邊一款，而且由勞工處認可嘅聽覺保護器方為合適。」
明哥繼續說：「仲有，我頭先大聲叫極你都無反應，證明你戴咗呢款耳塞根本完全聽唔到嘢。你首先要了解耳塞嘅減音能力會唔會過大，有冇阻住你收聽警告信號。有緊急事發生起上嚟，但你聽唔到警告信號，到時就仲大件事呀。」
強仔點頭說：「明哥，你唔講我真係唔知，我仲以為耳塞嘅減音能力愈大愈好。等我今日放工拿拿臨去買過第二對耳塞先！」
明哥嘆氣：「睇嚟唔係耳塞問題，係我講嘅嘢你聽唔入耳。頭先講咗要先搵合資格人士……」明哥之後再向強仔解釋。
職業安全健康局
www.oshc.org.hk