政情：曾寄CD畀囝囝 周永健收蘇聯歌做回禮
有時送禮物唔使好貴重，最緊要都係心意。香港賽馬會主席周永健就曾經收過一份好難忘嘅生日禮物，就係佢兒子為佢唱蘇聯歌曲。點解係唱蘇聯歌咁得意呢？
聽到好意外 特別心甜
周永健話，佢兒子去外國讀書時，佢就寄過一隻蘇聯音樂唱碟畀佢，點知有次佢生日，兒子喺香港，就唱咗隻碟入面嘅蘇聯歌曲畀佢聽。佢當時聽到兒子唱呢首歌都好意外，仲問兒子點解咁老餅嘅歌都識唱。兒子就答話因為喺外國讀書時，成日都聽呢隻碟，聽到已經識背喇。原來周已經唔記得自己寄過隻碟畀兒子，難怪聽到兒子咁講，特別心甜。
咁呢隻蘇聯歌曲唱碟又點嚟（口架）呢？周永健就話，佢曾經幫電台錄製過音樂節目，所以就搵過唔同地區嘅音樂。有一次佢想講蘇聯音樂，電台同事就燒咗呢隻碟畀佢喇。相信佢當時都估唔到呢啲蘇聯音樂，最後會演變成兒子送畀佢嘅禮物喇。