政情：吳文遠獄中遇黃之鋒 望「坐牢接力賽」早告終
社民連主席吳文遠二○一六年時被指透過新聞媒體同社交網站等，向公眾披露時任民政事務局常任秘書長馮程淑儀係廉政公署受調查人等資料，涉違反《防止賄賂條例》，去年已被裁定三項披露受調查人身份等資料罪罪成喇，日前佢就因為其上訴於高等法院被駁回，而要即時入獄。雖然只係喺獄中幾日，但就畀佢遇到香港眾志秘書長黃之鋒。兩人咁嘅情況相遇，算唔算難兄難弟呢？
吳文遠入獄第二日、即前晚就喺社交網站發貼文，話自己身體還好，只係有啲感冒，仲透露佢喺前日早上遇到同樣都係坐緊監嘅黃之鋒。吳仲引述黃之鋒話，過去發生大型運動時，都因為被捕而未能在場，覺得惋惜，希望呢場「坐牢接力賽」能夠早日完結喎。
黃之鋒今次之所以入獄，係因為佢喺二○一四年違反法庭命令，阻礙執達主任同埋警方清理旺角彌敦道嘅佔領區，被裁定刑事藐視法庭罪成。佢原本被判監禁三個月，不過高院上訴庭上月接納其減刑上訴，日前已經將刑期減至兩個月喇。