政情：獲細仔「留飯」 陳學鋒話「好感動」
中西區區議會副主席陳學鋒平時工作忙碌，有時夜晚都未必可以返屋企食飯。前兩晚佢返到屋企，細仔就「留飯」畀佢。聽落佢細仔都幾孝順同有心噃。陳就影低咗細仔留畀佢「成碗飯」張相，仲放埋上社交網站，兼留言話︰「好感動」添。點知原來係得少少飯，仲好似食剩嘅咁，有網友仲留言問係咪細仔想佢減肥添。
苦笑：爸爸通常係垃圾桶
陳學鋒話，其實碗飯係細仔食剩，佢咁啱返到屋企，細仔就遞畀佢，話︰「留飯畀你」，相信陳都唔知好嬲定好笑喇。陳就話，平時都有教囝囝食嘢唔好食剩喺度，而佢當晚就真係食埋細仔剩嘅飯，仲苦笑話︰「阿爸通常都係垃圾桶嚟嘅。」佢解釋其實係希望細仔見到佢咁樣做，會明白「粒粒皆辛苦」嘅道理。
問到今日係父親節，囝囝有冇送禮物畀佢以表心意，陳學鋒尋日就話，佢仲未知會唔會收到父親節禮物，又講笑話︰「通常都係食餐飯，不過我畀錢囉！」認真搞笑。