中環出更：漢奸黎自認麻煩製造者
《逃犯條例》修訂喺本港造成爭議，壹傳媒黎智英（漢奸黎）日前接受美國傳媒訪問時就自認係其中一個麻煩製造者，又話唔能夠製造麻煩後就離開，而壹傳媒會繼續營運，直至結業或佢被拘捕。黎又提到自己持有英國護照，但唔會離開香港，又話如果離開，佢兒女、子孫、太太會鄙視佢喎。真係信不信由你喇。
彭定康斥警用過分武力 被轟說三道四
另外，因政府修訂《逃犯條例》，引發市民上街遊行，上周三更有包圍立法會行動，警方需驅散示威者。末代港督彭定康（肥彭）就撰文繼續唱衰《逃犯條例》，又話世界各地政府，尤其英國應要表態，本港同北京都要知如繼續修例，並以發射橡膠子彈及施放催淚氣體達到目的，將對本港帶來乜嘢損害。
肥彭仲話，現時所見嘅暴力都係唔能夠接受，當市民和平示威被政府漠視，無可避免就係年輕人將行動升級。襲擊警察係錯誤行為，但更錯嘅係警察動用過分武力，仲話應要展開公開研訊調查。
時事評論員陳雲生批評肥彭已不在其位，唔應該說三道四，又話本港回歸前都發生過多次騷亂，亦曾出動防暴警察。警方現時已比以前容忍同克制，認為肥彭應心知肚明，冇理由唔清楚，直斥肥彭喺度顛倒是非，擘大眼講大話。
卓妮