中環出更：王嘉恩練武周身傷 靠日常拉筋紓緩
香港人工作壓力大，往往會畀藉口自己唔做運動，引致身體健康亮警號。尋日保良局趁父親節前夕就搞咗個長者探訪活動，期間就有義工即場教長者做拉筋伸展動作。保良局主席馬清楠同香港國術總會創會會長王嘉恩就異口同聲叫大家唔好搵藉口唔做運動。王又話，佢曾經因為練功夫而周身傷，都係靠拉筋紓緩咁話。
王嘉恩話，年輕時已開始打功夫，不過就搞到身體及關節周身傷。而佢多年前，已習慣每晚都會做拉筋運動，有時就喺屋企同太太一齊做，有時要出外工作，就會喺酒店或室內做，仲話其實做運動嘅地方唔需要好大，亦都可以舒舒服服、慢慢咁做運動，總之就唔好搵藉口唔做喎。咁勤力運動，唔怪得每次見到佢，都容光煥發喇。
而馬清楠主席都話，無論工作幾忙，都會抽時間每周打一次網球，亦會盡量行多啲，唔好畀關節咁容易退化，而佢亦都有做拉筋伸展動作，仲話有時唔做運動，成個人感覺好唔舒服，所以佢一直堅持做運動咁話。
尋日另一個活動上，就見香港義工聯盟主席譚錦球、常務副主席馬浩文同香港義工基金常務副主席文穎怡。譚話，多年前關節開始痛，好彩佢堅持每日游水，令關節痛問題得到紓緩，否則真係可能會影響日常工作同生活咁話。
文穎怡耍太極減壓
而文穎怡就表示，自己冇咩病痛，反而有時就覺得壓力大，每次壓力大同埋煩躁時，就會耍太極減壓，而佢已經學咗十年太極，覺得對減壓同埋靜修都好有幫助。而馬就有踩單車嘅習慣，但係上年開始工作量太多，就改為步行運動，每日最少行一萬步，依家都冇乜大病痛，真係好喇。
卓妮