立會撥款大塞車 政棍拉布誤蒼生

無恥嘅人見得多,好似反對派政客咁無恥嘅極品的確少見,班友吹雞叫市民遊行「反送中」,居然好意思打住「為香港未來」嘅旗號。好心佢哋冇鏡都搵盆水照吓自己先喇,特別係嗰班垃圾會議員,做多啲實事,拉少啲布,香港自然一天光晒,市民送萬民傘畀你哋都嚟唔切喇!

呢嗱,立法會就快暑假休會,財委會主席陳健波埋單計數,今個立法年度一共召開八十三個鐘頭會議,批出六百一十五億元工務工程撥款,反而尚待審批嘅撥款超過七百幾億元,即係話成功率不足一半,都咪話唔誇張。佢老哥又話,希望可以加開二十個鐘頭會,爭取喺休會前盡量通過最多撥款。

狗咬人唔係新聞,人咬狗至係新聞,反對派政棍拉布阻住地球轉,市民早已見怪不怪。想當初班友話拉布係同政府「抗爭」嘅「核彈」,結果係又拉唔係又拉,最終演變成無差別嘅狂轟濫炸,平民百姓「死傷慘重」。淨係睇吓家陣財委會積壓嘅撥款項目,除咗極具爭議性嘅「明日大嶼」前期研究撥款,其他諸如重建、改建醫院,以至橫洲公屋發展前期工程等,絕大部分都係純民生議題,就知班友害人不淺。

開講有話,斷人衣食猶如殺人父母。建造業工友三日開工、兩日踎躉,有人形容業界「一時做死,一時餓死」,苦況不足為外人道,工友們搵邊個追數,仲使功夫茶多講。咁都未算大劑吖,基建工程逼埋一齊開工,進一步延誤超支唔在講,犧牲質量趕死線先至死得人多。

反對派司馬昭之心,路人皆見,佢哋拉布無所不用其極,講到底無非想全面癱瘓政府施政,為達目的「攬炒」在所不惜,叫佢哋高抬貴手「先易後難」,同與虎謀皮冇乜分別,「波哥」想話加班加點爭取更多撥款,慳番啖氣暖肚好過;至於另一位「波哥」、財政司司長陳茂波就更加係太傻太天真。中美貿易戰不斷升溫,本港經濟陰霾滿布,佢老哥早排話要增加公共開支、加快推動基建發展。咪玩喇,面對垃圾會鬥獸場,連佢老細林鄭都舉手投降,認「冇政治能量拆解」,更何況佢呢個「史上最廢財爺」?

咁當然喇,烏鴉別笑豬太黑,反對派玩拉布固然玩到出神入化,特衰政府何嘗唔係行家裏手。舉個例子,港府一四年提出連接將軍澳寶琳站至鑽石山站嘅港鐵東九龍線,原本預期二五年落成,點知都唔使反對派拉布阻撓,官老爺自己一拖再拖,到依家仲係只聞樓梯響,問你服未。

始終都係呢句︰官府無能、政客無恥、市民無奈,香港想「明天會更好」,真係發夢都冇咁早!