康樂及文化事務署轄下嘅公眾游泳池因為救生員人手不足，經常都因冇救生員當值而需要局部，甚至全部關閉，市民想去游水都難。有立法會議員同一班市民尋日就去政府總部請願，要求政府諗計改善，仲向政府遞交請願信添。不過接信嘅竟然就唔係康文署署長李美嫦，而係民政事務局局長政治助理黎穎瑜。雖然康文署屬民政局管轄，但由黎接信似乎有啲轉折。唔通黎因為早前喺立法會人事編制小組委員會被議員質疑冇影後知衰，所以連尋日係端午節假期，都照開工幫李接信，希望可以補鑊？
