政情：返中大撐枱腳黃錦星直呼「祖堯BB」
依家讚靚女都會喺嗌名之後加「BB」，但大男人畀人嗌「BB」，又會係乜嘢反應呢？話說香港中文大學前校長沈祖堯接任咗環境運動委員會主席，環境局局長黃錦星日前就約佢返中大撐枱腳兼拍短片，做「星星飯局」嘉賓，黃仲叫沈做「祖堯BB」添！
黃錦星都唔知係玩沈祖堯定係真心讚佢，一開口就叫沈做「祖堯BB」，又問佢呢個名有何來歷？沈就話，最初聽到都覺得好驚訝，事關只有媽媽先叫佢「祖堯」，點知「祖堯」之後仲加「BB」，後來佢發現原來係年輕人鍾意咁叫佢，因為親切同友善啲，所以佢都好受落。
兩人食素講環保經
點解兩人約喺中大食飯？係因為沈祖堯做校長時大力推動低碳同環保，中大仲開咗素菜餐廳，兩人就一齊食素。有黃錦星喺度，話題當然唔少得減廢、惜食、走塑同湊女經。黃話佢有教個女唔可以食剩嘢，沈就認為首先要煮少啲，煮多咗又唔准剩嘅話就好易肥喇。而當日佢哋同枱食嘢，果然拍完片就「光盤」，冇做大嘥鬼。