政情：反強制着高踭鞋 方國珊撐平底鞋更佳
日本掀起反對僱主強制女職員着高踭鞋上班嘅行動，有「哪吒」之稱嘅西貢區議員方國珊就喺社交網站上載一張有多對平底鞋嘅照片，力撐行動。原來哪吒都試過被要求着高踭鞋返工，就係佢喺電視台任職時期，同以前有廣告商公司要求佢着高踭鞋。不過佢話着高踭鞋的確幾靚，亦非完全反對着，但覺得應該留番個選擇權畀女士咁話。
哪吒話，本港都有要求女職員着高踭鞋返工嘅情況，普遍係中層人士，即使公司冇列明，但個個都着嘅情況下，女士就算本身唔想都要跟從。佢試過出席晚宴時着高踭鞋，由於要企好耐，都覺得好辛苦，如果女士長期着，仲會有腳趾公外翻問題添。
哪吒更着重腳形健康
做區議員成日落區，擺街站亦需長期站立，哪吒就着運動鞋同注重腳形健康嘅鞋款多啲，仲話如果着平底鞋，佢一日行六、七千步都冇問題，佢教女士們可着平底鞋出門，必要時先換番高踭鞋喎。