政情：陪太子準備考試 陳學鋒嘆課程唔容易
父母希望子女有快樂童年，同時要平衡佢哋嘅學業成績，尤其講緊影響升中派位嘅呈分試，好似中西區區議會副主席陳學鋒正正面對呢個情況，所以都要陪太子讀書。
成績如利物浦一樣難測
陳學鋒有兩個囝囝，其中就讀小五嘅大仔就應考首次呈分試，所以佢同太太都好上心，太太更話唔可以分心同時為兩個小朋友溫習，早前就要求佢呢兩星期嘅周末留守分工，實行陪太子讀書。佢笑指呢排好似將小學課程重新學一次，大嘆以前簡單好多，好似數學只需要識加減乘除，但現時就好似閱讀理解一樣，要非常小心睇題目。
今次兩個囝囝考試有父母特別落力，係咪可以稍為放心呢？陳學鋒笑指，囝囝成績如其愛隊利物浦一樣難以預測，所以都好難講喎。不過，利物浦今年成績唔錯，事隔十四年再次贏得歐聯，如果佢囝囝似足嘅話就無問題喇！