政情：今日你上鏡：朱凱廸炒車整損手臂 改搭車去活動場地

立法會幾位民主派議員都有踩單車嘅習慣，其中更有議員係以單車代步。尋日立法會議員朱凱廸出席一個活動時，就見到佢右手前臂包紮咗，而且件衫同條褲仲有少少血漬添。而佢行路時，都有少少拐吓拐吓咁，原來佢就係因為踩單車出事。朱凱廸話，佢尋日本身諗住踩住單車去出席活動，點知就中途炒咗車，仲擦損咗手腳添，所以同事就幫佢包紮傷口喇。朱凱廸出席活動出師不利，之後當然都冇得繼續踩單車去到活動場地啦，最後佢就只能夠搭車去活動現場喇。