政情：禍從口出 胡志偉 胡作非為傳畀老鴿照肺

胡死撐指自己言論「恰如其分」

話說立法會最近因為政府擬修訂《逃犯條例》而鬧哄哄，反對修例嘅民主派更係不斷批評政府。立法會五月舉行特首答問大會，民主派亦趁機會發炮。當時胡志偉亦都批評特首，為本港帶來破壞同失職，其後被主席梁君彥逐離會議廳時，胡就邊行邊咒罵特首，表現得相當激動，在場人士都感到驚訝。

胡嘅言論及後亦引起風波，被外界批評係有侮辱成分，而有關言論出於激進民主派議員之口，可能會被視作理所當然，但就同該黨一向傾向溫和嘅作風大相逕庭。白鴿黨中人透露，胡因此事而被「照肺」，有「老鴿」仲直斥胡作為黨主席，代表成個黨，但言論就同街市阿嬸鬧交冇分別，實在係唔恰當。

咒罵行為恐影響商界捐款意欲

消息又指，胡嘅言論唔止惹來老鴿批評，亦都令過往有捐款予該黨嘅商界有微言，甚至有商界人士直言於該黨周年晚宴時「仲捐咗錢畀佢唱歌添」，所以話，胡今次嘅行為分分鐘影響該黨嘅捐款收入，加上該黨立法會議員曾要求政府高層下台，之後該黨再舉行晚宴籌款，料有關政府高層都不會被邀請出席，有機會影響商界嘅捐款意欲，該黨要籌募經費嘅話，難度亦會增加。

胡志偉回應查詢時就否認有被照肺呢件事，亦聽唔到有不滿佢有關言論嘅聲音，認為言論只係針對特首，係恰如其分。對於會否擔心言行咁激會影響商界等對該黨嘅支持，佢就話每個人都有自己嘅態度喎。胡作為黨主席，其一言一行都代表個黨，比起其他黨員，佢更應該謹言慎行，否則上樑不正下樑歪，下面啲黨員咪有樣學樣囉。