中環出更：立會足球賽撞正遊行 民主派冇晒人
立法會近日氣氛緊張，互罵及肢體衝擊場面頻頻上演，都咪話唔亂。不過立法會足球隊一於少理，將於明日舉行足球友誼賽，但由於比賽撞正民主派舉行嘅遊行活動，民主派議員應該都唔會有時間去踢波喇，咁樣會唔會令呢場已經係改期上演嘅比賽一改再改呢？
改期一波三折
呢場比賽對手係九龍地域校長聯會校長足球邀請隊，兩隊原定上月中進行友誼賽，但當時立法會有唔少法案委員會要加開會議，經評估風險後決定改期，點知改至明日舉行時又撞正有遊行，認真一波三折。
立法會足球隊召集人何俊賢（高佬賢）話，場波都會如期進行，現時已有七名議員參加，符合晒人數要求，而佢更已千叮萬囑，叫體育、演藝、文化及出版界議員馬逢國到時就算着皮鞋都要到場，事關對方係體育界代表，走唔甩咁話。
比賽當日話晒撞正民主派搞遊行，球賽會否一面倒得建制派議員出席？高佬賢話，出席名單好似冇民主派議員，但建制派議員陸頌雄同何啟明都會帶小朋友出席。莫非民主派議員全部唔見影，所以要出動埋小朋友去應戰？
卓妮