中環出更：魚生有蟲都唔驚 陳振英眼不見為淨
常言道「病從口入」，不論食乜嘢都有機會出事，但近日網絡瘋傳一段刺身有活蟲嘅短片，嚇到一眾網民花容失色，唔知成日出席宴會飯局嘅立法會議員又有冇遇過呢？金融界議員陳振英（Ronick）對有關網傳短片大叫「唔好」，又笑言自己食魚生嘅資歷尚淺，未見過有蟲，過去嘅進食經驗十分好，就算有同事話佢知啲魚生食物廠會聘請專人「捉蟲」，佢都當聽唔到，眼不見為乾淨喎。
Ronick話以前怕肚痛，所以唔敢食生嘢，記得第一次去北海道時，人人都食海膽，一板一板咁食，自己就只係食熟食，之後就慢慢試吓，先開始了解魚生嘅滋味喎。而佢最愛嘅就係盛傳有好多蟲嘅三文魚，幸好至今未見過有蟲。而喺年初誕女嘅立法會議員容海恩（Eunice）就對食物百無禁忌，同樣係睇唔到唔乾淨就照食，但為免「帶壞」囡囡，將來食魚生可能要偷食咁話。
何俊賢：睇清楚先放入口
不過Eunice都有過一次食嘢嘅恐怖經歷，十幾歲時喺一間茶餐廳叫咖喱飯時睇落幾「靚仔」，點知用匙羹舀起，就見到三大隻曱甴，嚇到佢即刻放低就走，連有冇埋單都唔記得。咁係咪戒咗食咖喱？佢就話冇，依家都仲成日食，仲反問有咩好怕，認真大膽。
漁農界議員何俊賢直指生肉都有蟲，所以睇清楚先放入口，又叫大家輕鬆啲，有啲衞生問題係無可避免，佢又相信有乜嘢肉可以生食係有研究過嘅，戲言如果有日自己食咗一啲不知名嘅蟲入口出事，嗰種蟲可能就會用佢個名命名喇。建築、測量、都市規劃及園境界議員謝偉銓就話一向少食生冷嘢，比較食得多嘅魚生係「拖羅」，而且會望清楚先至放入口喎。
卓妮