政情：公民講場：綜援雙糧就嚟搞掂 $4000整成年仲未見

講起財政預算案，大家最關心緊係有冇錢派。尋日政務司司長張建宗喺網誌就拿拿聲出嚟認叻，話立法會上個月通過咗《2019年撥款條例草案》，落實會出雙糧嘅長者生活津貼、高齡津貼、綜援等等多項社會保障津貼，最快會喺兩星期後就有得拎添。講開又講，依啲雙糧就咁快有得拎，政府上年派四千蚊嘅「關愛共享計劃」就仲未搞得掂，呢個計劃由財政司司長陳茂波（波叔）主導，由公布到申請都搞到立立亂，搞咗成年，仲有一大堆申請表計緊係咪合資格，依家仲好似派錢無期，成件事真係諷刺！