政情：劉國勳踢波瘦身 自爆細個入校隊

原來嗰張相係佢踢波時影嘅，佢話每個星期都會抽一兩日時間出嚟踢波做運動，又透露通常都會喺晚上九點半後先踢波，一來可以做晒手頭上工作，二來晚上踢波冇咁熱舒服啲。

七人場體力消耗唔少

佢話自己細細個就踢波，守過龍、打過前鋒，仲係校隊之一，依家踢七人場，唔係氣力問題，係因為大場冇咁容易book到同比較難約齊人，強調唔好睇小七人場呀，因為冇固定位置快上快落，消耗體力都好多咁話。

咁係咪想減肥呢？佢話一半啦，都想身體出吓汗健康啲，同埋可以同啲波友一齊踢波，開心之餘又可以減壓。至於有網友話佢明顯瘦咗，佢笑笑口話咁可能真係見效，最主要感覺到身體真係健康咗、精神咗喎！