中環出更：添丁八日即返工 馮英倫知驚？
近來唔少副局長同政治助理都被議員鬧成日唔見人，好少聯絡，包括發展局局長政治助理馮英倫（Allen）都曾經畀議員點名批評，不過近來見到佢添丁八日，已經現身立法會，唔通畀人話完識驚？
曾畀議員批評成日唔見人
上月廿五日，立法會加開嘅工務小組委員會，審議逾五億元嘅中部水域人工島嘅相關研究項目，項目爭議性咁大，難怪當日見Allen頻頻喺走廊度走出走入啦。
咁快現身，唔通冇放假就返工？Allen話，之前已經放咗五日侍產假，而且選擇開刀生BB，咁就更易預日子，當日會議結束後亦會返屋企，因為有親戚去探BB。
佢仲話已經開始上手照顧囝囝，唔似初初連掃風會驚整親，而囝囝曾經要留院四日照燈，不過佢就話嬰兒黃疸並非罕見，加上醫學昌明對小朋友嘅檢測足夠，亦有相應嘅專門治療可以令父母相對安心，之不過作為新手父母總會對BB打針、抽血等，覺得擔心同心痛囉。Allen仲話，依家有陪月員預備食材畀太太，連佢都有份受惠，搞到短短一個星期多已經增磅添。
卓妮