工業安全無人理 庸官當政亂象多

古時候一、二品大員戴嘅禮帽鑲有紅珊瑚珠,所以高官又叫做「紅頂子」。今時今日特衰政府勞工處一樣有大大頂紅色官帽,不過就係用打工仔嘅鮮血染成,官不殺伯仁,伯仁因官而死,就係咁解。

唔講唔知,原來本港每年發生超過四百宗工人從高空墮下嘅工業意外,平均每個月就有一名工人死亡。鬼咩,勞工處班官老爺做嘢求其揦西,好多時都係接到舉報後至派人調查,賊過興兵,蚊都瞓蛇都死。咁都唔止,勞工處每年平均向違例僱主發出約二百張傳票,平均罰款一萬四千元,最多亦只係罰五萬元咁大把,距離最高罰款五十萬元及監禁六個月,足足爭咁一大截,罰款當成本咯喎,唔有恃無恐至奇。

講真,本港工業安全紀錄一向劣迹斑斑,私人工程固然無王管,政府大型基建一樣唔好得幾多,淨係睇吓條港珠澳大橋,死傷工友數以百計,已經留下「奈何橋」惡名,就知咩料。

真係諗極都唔明,回歸前香港經濟騰飛,四周圍夠大興土木喇,點解又唔見工人開工要搵命博?道理一字咁淺,港英年代一切有規有矩,事頭婆在上,班官揸流攤極都有個譜;回歸後班友自以為翻身做主人,可以騎喺老百姓頭上作威作福,直頭話之你死,自然「多一事不如少一事,少一事不如不做事」。

冇錯喇,正所謂無規矩不成方圓,這些年香港諸事不順,亂象叢生,正正因為官僚乜都唔管,乜都唔理。第樣唔講,淨係講環境衞生一瓣,成個香港烏煙瘴氣,藏污納垢,以致鼠患氾濫成災,疑難雜症長爆長有,全球六宗人類感染大鼠戊型肝炎個案,香港居然佔咗五宗。大家有眼見,官老爺滅鼠根本冇與時俱進,鼠籠鼠餌數十年如一日。高官們近日煞有介事,召開跨部門會議商討滅鼠大計,點知最終淪為吹水會,官老爺助疫為虐,市民真係多得佢哋唔少。

香港近年十足十撞邪咁款,直頭食豆腐都會骾親。有邊個會諗到,堂堂一個國際大都會,竟然有本事連風災善後都搞到一鑊泡?「山竹」襲港後全港交通大癱瘓嗰筆都算嘞,依家個風走咗半年有多,塌樹仲係堆到周街係,呢筆數又點計。所以話香港之敗,由官邪也,難為成班廢柴霸住茅坑唔辦事,仲好意思印印腳乾(手豆)美國總統級人工福利,到底知唔知個「醜」字點寫(口架)!

事實勝雄辯。同一個公務員隊伍,以前幫洋鬼子打工就仆心仆命「高效廉潔」,家陣國家領導人耳提面命「為官避事平生恥」就關人個關,陽奉陰違,呢啲唔係洋奴心態又係乜吖?