政情：拍片為打工仔發聲 鄧家彪「急速衰老」
近期潮流興透過手機應用程式影返老還童照片，不過正值壯年嘅前立法會議員鄧家彪（Bill）就反其道而行，以滿頭白髮、面上布滿老人斑嘅造型示人，到底為咩要搞到自己急速衰老呢？
其實阿Bill係為一眾打工仔發聲，粉墨登場拍片建議政府為低薪人士代供強積金，佢喺片中帶住老花眼鏡，同飾演其孫女嘅細路女玩大富翁，但就發現開支龐大，唔夠錢使，相信道出唔少長者心聲。
被妻子囡囡取笑
阿Bill話，佢為咗「變老」，預先用咗九十分鐘化妝，拍得住玩開粵劇嘅囡囡化嘅大戲妝。不過，佢就話係低成本製作，事關係由其所屬嘅工聯會嘅化妝導師出手，連頸同手都冇漏化，全部有皺紋效果，真係做戲做全套喇。
阿Bill為咗更加逼真，片中仲扮反應慢同膝頭痛。佢囡囡同太太見佢呢個老年打扮都笑死咗咁話，而佢囡囡仲問佢老咗係咪咁嘅樣，認真搞笑。不過呢身打扮都令到佢有尷尬時刻，因為拍攝後仲要出席活動，身上仲有痕迹惹人注目喎。