政情：馮英倫初做爸爸 親戚授湊仔大計
對於想生兒育女嘅父母嚟講，能夠迎接自己嘅仔女來臨絕對係萬分期待嘅開心事。發展局局長政治助理馮英倫（Allen）嘅囝囝馮以仁上周五（17日）出世，Allen直言好開心，話太太係預約開刀，過程都相當快，生仔過程只係半小時左右，前後一小時就已經搞掂晒，相當順利，母子平安。Allen話，佢全程都陪住太太，依家香港已經有男士侍產假，所以唔單止可以陪太太入產房，未來幾日都可以有多啲時間陪太太咁話。
睇資料做足功課
對於第一次做爸爸嘅Allen嚟講，唔多唔少都有啲緊張，不過佢就話都有信心搞掂，皆因佢同太太一早已經做足功課，睇咗好多教新手父母點樣湊BB嘅資料，亦都已經請咗陪月員，了解晒坐月應該要食啲乜等等。Allen仲話，雖然佢哋自己冇湊仔經驗，但佢有好多長輩同親戚朋友都有，特別係有親戚咁啱最近先抱孫，都畀咗唔少意見佢哋。睇見Allen準備咁充足，相信湊仔應該都難唔到佢喇。