中環出更：臨時改開會時間 廖長江捱批
立法會《國歌條例草案》委員會喺密密加會下，審議工作已接近尾聲，不過尋日開會就發生小插曲，委員會主席廖長江（Martin）又再因會議安排而被民主派質疑，話佢好臨時更改開會時間喎。至於更改時間有咩影響？有民主派議員就自爆，原來係搞到佢哋冇得去探監。
民主派自爆去探監
民主派議員毛孟靜、莫乃光、范國威（Gary）等會上批評Martin開會安排。Gary話佢尋日上午另有工作，覺得Martin開會前一兩日先改會議時間，令議員難以安排，情況唔理想。而毛就話，尋日會議原定下午舉行，唔少民主派議員都喺上午安排咗探監，但依家將會議改咗上午舉行，質疑Martin係咪唔想民主派議員開會，迫使佢哋二擇其一。但建制派隨即就鬧爆毛「好煩」喇。
Martin解釋，唔少議員都會喺周六下午有安排，因此先改成上午舉行會議，希望可以方便議員，又話已經聽到議員對佢嘅批評，承諾下次作出改動時會先諮詢。不過佢都有提及是次改動於上周三（15日）已發出文件通知，暗指已有三日通知期。
卓妮