中環出更：寫作技能終身受用 李焯芬鼓勵閱讀
時下年輕人手機不離手，閱讀同寫作風氣都同以前唔同。香港中華文化促進中心理事會主席李焯芬尋日出席一個中學生作文比賽頒獎禮時就話，唔好以為只有作家同記者先至需要寫作，現今社會幾乎所有職業都離唔開各式各樣嘅文件，若自小就培養出寫作嘅興趣，就等於掌握一種畢生受用嘅技能咁話，所以大家都應該培養良好嘅寫作技巧喎。
李焯芬話，喺上世紀五十年代，大眾娛樂唔及得依家咁多姿多采，閱讀同寫作風氣盛行，但現今嘅年輕人就較少接觸文學作品，最常寫作嘅園地就係手機通訊程式，所以時下年輕人寫作風格往往都較簡短零碎，欠缺通盤布局。如果閱讀多啲經典文學作品，喺文言文方面下一番工夫，就可以寫出優美嘅文句喇。
蔡若蓮：吸取前人經驗先有墨水
教育局副局長蔡若蓮都有出席頒獎禮，原來佢學生時代多次喺作文比賽得獎。蔡話，童年時家境清貧，缺乏零用，但又想買書，見作文比賽勝出者可獲書券，於是就好熱衷參加作文比賽。佢又話，必須經常閱讀，吸取前人嘅智慧同經驗，再結合自己對生活嘅觀察，先至有「墨水」落筆寫出自己嘅文章，佢仲形容寫作能力就好似浸「滷水蛋」，無法一蹴而就。
同場嘅仲有今次作文比賽嘅評審委員會召集人兼元朗裘錦秋中學校長潘步釗、香港城市大學副監督鍾瑞明及城大校董會主席黃嘉純。潘話，依家學生都習慣喺網絡上閱讀文章，但網絡文章唔似得實體書，要經出版社同編輯把關，水準非常參差，所以佢都係主張閱讀實體書。鍾就話最近睇完一本內地科幻小說，閱讀時只覺得麻麻，但根據呢本小說改拍成嘅科幻電影就精彩得多，打破改編電影唔及原著精彩嘅印象咁話。
卓妮