政情：廉價成衣極氾濫 黃琪設診所醫舊衫
成立診所並非醫生嘅專利，曾奪香港十大傑出設計師大獎嘅本地時裝設計師黃琪（Kay）就同拍檔成立一間「診所」，而該「診所」嘅醫療對象就係巿民大眾嘅舊衣物喇。
批評Fast fashion摧殘環境
Kay成立時裝診所嘅故事係源於佢數年前到丹麥深造，期間佢領略到慢活同簡約生活嘅好處，令其反思自己所從事嘅時裝工業，尤其係講求時尚同價廉嘅Fast fashion，其生產唔止摧殘自然環境，亦都因生產基地通常設於勞工法例未完善嘅地區，所以同時亦都剝削緊第三世界嘅貧民。佢又話，有報告指平均每名港人每年就有三個行李篋嘅衣物送往堆填區，認為消費主義助長咗浪費風氣。
佢直言覺得時裝業已陷於病態，所以已極少添置新衣服，而佢亦重新思考設計師嘅使命，最終成立時裝診所，為舊衫重新賦予新生命。佢話，時裝診所唔止修補舊衫，仲可因應潮流改動衣物，或按服裝主人嘅身形轉變調整尺寸，甚至可將舊衣物用途重新設計，例如將外衣變成孕婦裝咁話。