政情：推蔗渣飲管招客怨 黃傑龍千字文伸冤
時下講環保，部分餐廳已開始「走塑」，唔提供塑膠飲管。經營飲食生意嘅稻苗學會會長黃傑龍（Simon）旗下食肆改為提供用甘蔗渣製造嘅環保飲管，但就向客戶收取每支兩元，近日佢收到客戶投訴，質疑佢哋為節省開支先咁做，仲話「就係呢樣嘢令食客失望同討厭的原因」。Simon就發千字文「伸冤」，話甘蔗渣飲管價錢係全數捐出支持環保，賣一支蝕一支咁話。
收益全捐環保社企
Simon就客戶投訴喺社交網站發表千字文，解釋傳統塑膠飲管成本「平到近乎等於唔使錢」，而佢哋提供嘅甘蔗渣飲管每支成本係八毫三仙，由於出售飲管每支收取嘅兩元會全數捐畀環保社企，所以每出售一支，佢哋就蝕八毫三仙，而且仲未計製作環保宣傳品費用。
點解蝕住都要做？Simon話，之前睇到一個澳洲環保節目，話大海已嚴重被塑膠污染，仲直接影響人類食物鏈，所以就的起心肝減塑，仲連買膠樽飲品同用飲管嘅「癮」都戒埋。如果大家都為環保出一分力，唔用飲管或自備飲管，相信就唔會出現呢場小風波喇。