政情：立會膠事一籮籮 塑膠回收零舍多

回收量達19公斤 勁增19倍

根據立法會秘書處嘅資料，立法會綜合大樓收集嘅可回收物料數量，喺一七至一八年度，紙張、鋁罐、塑膠同玻璃都明顯下跌，唯獨塑膠方面由一七至一八年度嘅廿二公斤，跌至一七至一八年度不足一公斤，但一八至一九年度截至二月底已回升至十九公斤，大幅飆升十九倍。眾所周知，一八至一九年度開始咗冇幾耐，四月就發生峯鴿搶手機事件，咁啱呢條問題仲係峯鴿問嘅，唔知佢會覺得好嬲定好笑呢？

至於鋁罐同樣有回升，由一六至一七年度嘅廿五公斤，先跌至去一七至一八年度嘅七公斤，但去年度截至二月底，又回升至廿四公斤。玻璃方面跌完就冇再升嘞，一七至一八年度跌至不足一公斤，去年度截至二月底，仍然不足一公斤。至於金屬、電線等其他可回收物料就由一六至一七年度逾三百公斤，大幅跌至一七至一八年度嘅十五公斤，去年度仲跌到只有個位數。

秘書處今年起將審計廢物

立法會秘書處解釋，金屬、電線等其他可回收物料係來自大樓內收集可回收建築物料嘅環保斗，由於呢兩個年度嘅裝修工程數目較往年少，工程規模亦較小，故可回收物料數量都有所減少，但就冇解釋點解多咗咁多塑膠。秘書處又話，會定期量度大樓嘅廢物棄置量及所產生的可回收物料數量，盡力減廢，以及會提高大樓使用者嘅減廢意識，仲話喺本年度起，每年會進行廢物審計，令秘書處同大樓其他使用者知道日後可以點樣盡量減少廢物。

好多市民都話，立法會最廢係議員，日日開會搞完一大輪大龍鳳，都好似唔知有咩貢獻咁，其實秘書處都有就議員工作進行審計，包括統計議員的出席率、提出口頭及書面質詢、動議辯論數目等，等議員知道係時候要幫自己減「廢」。