中環出更：廣告遲三年終「掛上」 方國珊：傷痛補償
每逢立法會換屆，街道及隧道口都會多好多宣傳橫額、直幡或廣告牌，但如果宣傳品遲咗三年先掛出嚟，就真係乜都過晒氣。有「哪吒」之稱嘅西貢區議員方國珊於二○一六年參加立法會換屆選舉時，曾計劃喺粉嶺百和路設大型宣傳廣告牌，點知被有關方面以該處有工程為由禁止，佢仲因此事而入稟法院追討索償添。
自嘲「傻人有傻福」
最近佢嘅廣告牌終於「上架」，足足遲咗成三年，不過佢都好有「阿Q精神」，自嘲「傻人有傻福」。
哪吒尋日喺社交網站發貼，話當年原本想喺百和路設置大型宣傳廣告，雖然已畀晒錢，但有關公司以該處有擴闊道路工程為由，唔畀佢嘅廣告上架。佢話當年已獲土木工程拓展署批准，質疑有人阻撓佢設置廣告。而佢亦因此多次示威同向政府部門投訴，最後仲鬧上法庭。
哪吒尋日就公布有關案件最終「調解而獲額外補償一個免費廣告」。而該免費廣告牌近日就設置於沙田獅子山隧道口。哪吒當年敗選，再一次同立法會議席擦身而過，難怪佢都形容今次係「三年後的傷痛補償」喇。
卓妮