中環出更：林淑儀為顧形象 唔敢染髮
金紫荊女企業家協會（協會）日前換屆，由林淑儀接替丘璟珊成為第四屆執委會主席。林淑儀同好多女士一樣，出席重要場合前都會先幫襯髮型師傅整理一下頭上青絲，務求以最莊重嘅儀容示人。不過林就自爆成為人母之後，唔敢染頭髮，就算想染頭髮，都會等到萬聖節，一年一次應下節就算喎。
林淑儀話自己唔算奄尖，只要搵捲髮器將髮絲末端略為捲曲就覺得遂心愜意。不過對繽紛色彩情有獨鍾嘅佢就話，其實都有諗過將一把烏黑油亮嘅秀髮染成紅橙藍紫等顏色，但因為已為人母，又要見客傾生意，為免破壞穩重形象，頭髮都係黑色比較好喎。
徐詠琳：要包容心儀髮型師
有份出席就職典禮嘅仲有協會第一常務副主席章曼琪、執行委員會員張蕙然、許佩珊、會員陳沁妶同金紫荊女企業家非凡大獎得獎人徐詠琳。徐詠琳早前就遇到一位好啱心水嘅髮型師，近來更同對方合作經營美髮廳。徐話，對於注重儀容嘅女士而言，要搵一個符合心意嘅髮型師就同遇上心儀對象一樣咁難，所以女士們若搵到合心意嘅髮型師，就要體諒同包容，對方就算偶一失手，都要寬宏待之。徐又話，佢嘗試緊學習剪髮技巧，不過就苦無「勇士」願意成為佢嘅實習對象，所以目前只有用公仔頭練習喇。
頭髮只係長至肩嘅陳沁妶就話，自己嘅髮型處理起上來比較簡便，只要將頭髮盤成髻，就已經有端莊整齊嘅效果。不過佢就覺得若果頭髮只得黑色，喺舞台上嘅視覺效果會較呆板，而專業嘅髮型師傅會考慮到舞台燈光嘅色溫，以選用最恰當嘅顏色為頭髮做Highlight，營造層次感之餘亦會做足護理，以防秀髮受化學劑損害，所以對於經常登上舞台嘅人嚟講，髮型師真係好重要咁話。
卓妮