政情：八網難逃：梁志祥 葉文斌 掘幾百斤番薯派街坊

前立法會議員鍾樹根卸任議員後就喺內地發展佢嘅農業天地，其兩位黨友屯門區議員葉文斌同立法會議員梁志祥（祥哥）日前亦都去咗廣州掘番薯，葉仲將自己同祥哥都落手落腳掘番薯嘅相上載到社交網站添，唔通佢哋都想學樹根務農為樂？祥哥話，佢早幾日帶埋葉等十多個議員同幹事去咗廣州番禺南沙掘番薯，因為佢想帶啲番薯返香港派畀街坊。祥哥又話，佢哋十幾人一共掘咗幾百斤番薯，依家安排緊下星期運送返香港，到時就會連同其他健康食品例如湯包等，一齊派畀街坊。依家好多人都關注健康，祥哥都話，今次活動旨在拋磚引玉，希望透過派發健康食品，提醒街坊要多啲注重健康咁話。