政情：屋企爆生態大災難 楊小玲：人為失誤
全球暖化問題嚴重，造成生態大災難，但估唔到喺屋企都可以發生啲咁嘅事，講緊係外號「暗瘡剋星」嘅九龍樂善堂主席楊小玲（Jackeline）屋企。早前喺一個中學探訪活動上遇到Jackeline，當時佢好入神咁欣賞緊一個大魚缸，點解會咁有興趣？皆因佢同丈夫都好喜歡大自然，所以喺屋企設有大魚缸，養咗好多可愛珊瑚魚同色彩繽紛嘅珊瑚，每日都可以親親大自然。
丈夫換缸水忘閂掣 珊瑚死晒
眾所周知養珊瑚水質好重要，Jackeline就話其實唔難，只要安裝控制水溫同鹽度嘅設備，間中添番啲新水落魚缸就得，佢哋仲特登喺車房安裝咗套濾水器，只要打開水喉就有潔淨嘅水引入魚缸， 成個過程十零分鐘搞掂。
不過，Jackeline話無論科技幾先進、設備幾齊全都好，只要人為失誤就可以釀成生態大災難，話說有日佢丈夫幫魚缸添新水，開咗水掣就去咗做運動，做到忘記咗閂水掣，只係四十五分鐘，珊瑚就全部死晒，最後要花幾個月時間，先養番一缸又大又靚嘅珊瑚。