政情：市民氣功秘笈贈陳恒鑌 寄錯畀張國鈞
本報早前報道立法會議員陳恒鑌（Ben）因腰痛問題而的起心肝減肥，有讀者睇完後就好有心機咁手寫咗長達八十頁嘅「氣功秘笈」寄去立法會。點知Ben嘅黨友、立法會議員張國鈞（Horace）就疑似打算私吞扣起自用，有冇搞錯？
話說Horace上月底收到讀者一份內藏剪報及八十頁手寫秘笈嘅郵件，註明係練氣功治病用。該秘笈一開始就教有關貫通身體主要氣脈嘅動作，之後就教「接地氣、樹氣、太平氣」，仲有打通手臂氣脈同手掌穴道等，真係花多眼亂。Horace喺社交網發貼，就話見到咁大疊資料，以為係政策意見，點知係醫傷患同保健嘅資料，感受到市民嘅愛心同關懷，仲話佢會轉交畀Ben o架喇。
話刨完書再同陳練功
不過，問到疊資料唔係寄畀佢，有冇好傷心時，佢就笑笑口話冇，仲大讚讀者細心，話讀者應該係知道立法會近來好忙，議員坐得多會腰痛。佢仲話打算稍後刨完書先再拉埋Ben一齊練功添。