政情：容海恩為湊囡再讀「博士學位」
身兼大律師嘅立法會議員容海恩（Eunice）本身已經係香港城市大學法律博士，最近佢就話讀多個博士學位，咁佢究竟讀咩呢？
寫信慶祝囡囡出生百日
原來作為新手媽咪嘅佢，係講緊湊女經，話點樣抱得囡囡舒舒服服、點樣餵奶、如何選購最適合囡囡嘅嬰兒產品，甚至奶嘴嘅速度快慢，對佢同老公袁彌昌嚟講，都係另外一個「博士學位」，統統都係大學問喎。唔知Eunice覺得讀法律博士難啲，定湊囡囡難啲呢？
Eunice囡囡袁昌蔚出生百日，佢於是喺社交網站上載一封畀囡囡嘅慶祝信。信中形容呢日係佢哋一家人嘅大日子。Eunice話，佢照顧BB可以話係由零開始，但佢兩公婆對湊BB興趣甚濃，願意虛心學習去做稱職嘅父母，為囡囡打造理想、健康嘅成長環境。佢仲自爆因為要工作，又要照顧囡囡，搞到兩公婆都變咗「緊張大師」，不過見到囡囡健康成長，就覺得所有辛勞都值得，仲話囡囡令佢重生添，咁係咪應該生多幾個呢？