中環出更：向泛民開火 周浩鼎反被翻舊帳
立法會最近開創新歷史，有法案委員會開咗兩次會都未能選出主席，迫使建制派出招應對。尋日立法會內務委員會開會討論有關法案委員會主席選舉事宜，民主派例牌與建制派對着幹。屬建制派陣營嘅立法會議員周浩鼎（Holden）就發揮重炮手本色，點知就變咗畀位泛民反擊翻其舊帳，重提其被指「打龍通」事件。
重提「打龍通」事件 揶揄史無前例
Holden會上直言，立法會委員會花兩次會議、共四小時都未選出主席係歷史上未曾見過、荒天下之大謬，直斥主持會議嘅議員厚顏拉布，先導致無路可退，如果唔處理，就等同縱容民主派任意妄為、狼狽為奸，重申係民主派無賴在先，建制派先要出招。
民主派議員聽完後不甘示弱，仲重提Holden作為調查前特首梁振英嘅專責委員會嘅副主席，卻涉嫌同梁打龍通一事。其中法律界議員郭榮鏗就話，自己做七年議員都見過唔少立法會史無前例嘅事，例如有專責委員會副主席串通調查對象，揶揄Holden所為同樣史無前例。
雖然Holden被舊事重提，但廉政公署去年已完成相關調查，並講咗周同梁嘅案件經徵詢律政司意見後，認為無足夠證據提出檢控而達致合理機會定罪o架喇。
卓妮