中環出更：港產發呆王 寫冥想App助人減壓
「你有壓力，我有壓力」。香港地生活緊張，連青少年都面對各式各樣嘅壓力。太平山青年商會（商會）早前喺銅鑼灣街頭訪問百多名青少年，發現迷茫嘅前途同沉重嘅功課都係青少年最主要嘅壓力來源。前年奪得國際發呆比賽冠軍、有「港產發呆王」之稱嘅陳棨豪（Hercules）亦曾因學業壓力而情緒低落，幸好佢識得以冥想解壓，依家仲自己創業，編寫有關冥想嘅應用程式，希望幫到其他人減壓添。
商會尋日舉行青年論壇，Hercules都有出席。佢係末代高考生，當年因為高考成績欠理想而決定重考，但就要改為應考DSE。由於考試範圍同內容都同高考唔同，又冇同學一齊重考，孤軍作戰令到佢倍感壓力，於是佢就嘗試搵方法應付，結果就學識透過冥想消除日常面對嘅壓力喇。佢又話，冥想令生活有喘息嘅時刻，亦係生活嘅留白，生活好似一幅畫，唔止有工作、家庭同事業等各種色彩，都要留少許白色，畫面就會更精彩。
馮應謙畀囡囡按興趣學習
同場仲有商會會長阮佩嬋、副會長鄭淦元、香中文大學亞太研究所教授馮應謙、有「蜘蛛女」之稱嘅鄭麗莎（Lisa）及藝人游學修。已為人父嘅馮就話好明白小朋友學習會有壓力。佢囡囡以前讀嘅小學要求學生識玩樂器，馮就帶囡囡學小提琴，仲聘請優秀導師，結果囡囡連第一級考試都過唔到關。後來佢偶然發現囡囡可以喺極短時間掌握單簧管吹奏方法，先知係囡囡嘅天分不在弦樂。囡囡到加拿大升學後，更成為學校首席單簧管手。所以馮都話，青少年因應其興趣學習嘅話，就唔會有咁多壓力喇。
至於育有多名子女嘅Lisa就話，為人父母必然關心兒女成長期間遇到嘅學業同人際交往問題，認為父母同子女應猶如朋友，子女遇上壓力就會樂於同父母傾訴，咁就可以一齊尋找解決之道喇。
卓妮