政情：林偉強整親條腰 自嘲老骨頭
唔少都市人長期坐姿不當搞到受腰患困擾，但亦有人腰痛係受意外所致，好似自言向來健康嘅新界鄉議局副主席林偉強日前落車出現小意外，搞到要做物理治療喇！
日前落車扽親
前日見到林偉強行路唔似以往咁健步如飛，雖然唔使用拐杖輔助，但見佢久坐起身時要按住條腰，明顯睇得出有唔妥喇！佢就話早幾日揸車，解開安全帶後落車時扽親，所以現時坐低起身嗰下好鬼痛，仲有瞓醒起身嗰下都係另一種痛楚。
佢更自嘲老骨頭，明明以前好Fit，對比之下就話現時好慘囉！不過事後照X光後發現無傷到骨，都算不幸中嘅大幸，而依家主要係接受物理治療，仲大派定心丸話自己OK添！希望佢盡快康復喇！