政情：喊住食豬膶麵 盧偉國：係阿媽嘅味道
立法會議員盧偉國（WK）鍾意四圍「搵食」亦是煮得之人，佢嘅「盧家私房菜」煮出嚟嘅菜式，令人讚不絕口。話說尋日佢又「出巡覓食」，竟然食到眼泛淚光。做乜咁感性呀？
WK喺Facebook上載咗幾張相，當中有湯麵、菠蘿油同叉燒煎蛋飯等等，似係茶餐廳格局喎。果真，佢喺貼文話喺間茶餐廳食到一碗「夠薑豬膶牛肉湯麵」。有乜咁特別？點解搞到佢喊住咁食呢？重點係「夠薑」。
特色係濃郁老薑味
佢話細個阿媽成日滾豬膶湯畀佢飲，仲會加好多薑，因為營養豐富，啱細路仔，但到咗今時今日好多人都注重健康，怕內臟膽固醇高，所以有賣豬膶嘅餐廳已經少之又少，而佢今次去嘅餐廳唔單止有豬膶賣，仲加咗幾大塊連皮嘅薑落去，完全還原到兒時阿媽淥嘅豬膶湯，嗰種鮮甜加濃郁老薑特色嘅味道，佢不禁話「係嗰種味啦！」仲話食到眼泛淚光添！咁難得搵到阿媽嘅味道，難怪佢咁感動喇！
原來尋日佢仲陪老婆去咗逛街市，買咗新鮮嘅老虎蝦，話整乾煎老虎蝦喎，又話佢細路仔嘅時候，家家戶戶都識得整「乾煎蝦碌」呢味餸。