中環出更：成日掛住打卡 陳百里寫錯「顧員顧主」
尋日係勞動節，社會各界都舉辦咗唔少活動感謝勞工界嘅辛勞付出，同時爭取勞工權益，而商務及經濟發展局副局長陳百里都出席咗一個最佳僱員僱主選舉嘅活動，表揚僱員僱主。
向來鍾意自拍、打卡嘅佢，今次都有喺Facebook（Fb）貼文介紹個活動，點知佢劈頭就寫錯字，將「僱員僱主」寫咗做「顧員顧主」，唔知係咪佢掛住睇張相靚唔靚，所以冇留意到文字上出咗錯，搞到咁失威呢？
實際工作懶得做
佢仲喺相關嘅貼文中提到，人力係香港最寶貴嘅資源，有助促進社會同經濟持續發展等，聽落就好着緊勞工同社會發展嘅關係，不過查實佢早前先被多名立法會議員炮轟佢掛住出席活動、影相打卡，實際工作例如向議員介紹政策、條例等就唔做。
畀議員鬧到咁甘，有冇收斂吓呢？雖則未知佢喺工作上有冇改進，但可以肯定嘅，係佢依然經常打卡，好似當班議員鬧嘅係耳邊風，而依家連貼文標題都出錯，咁粗心大意，令人質疑佢有乜嘢會上心，仲有邊一瓣係做得好嘅呢？
卓妮