中環出更：重踢膠波仔大賽 黃創增守門冇失威
俗稱「西瓜波」嘅紅白間條塑膠波，係七十年代紅極一時嘅玩具，原來仲有個外號叫「膠波仔」。有「錦鯉大王」之稱嘅黃創增（Joseph）尋日重返母校天主教伍華中學，參加校友會膠波仔大賽，係佢自一九七九年中七畢業後，四十年來首次再踢膠波仔，負責守龍門嘅佢一啲都冇失威，撲走多個射球，果然寶刀未老！
所謂嘅膠波仔，即係用電線膠布綑綁包住個西瓜波，增加重量兼防爆波，最重要係防止踢爆球場隔籬嘅教堂玻璃窗。Joseph同足球好有淵源，皆因佢哥哥黃創山係香港著名足球隊、精工體育會主席，所以佢守龍門技術就係師承球隊外援、馬來西亞國家足球隊前守門員林方基。佢又笑稱，讀書時做足球隊隊長，見到隊內有一兩個好波之人，就會拉埋去體育會同甲組球員練波，有時更會拉大隊去睇比賽，豪言自己係足球隊元老。
倪錫水憶當年畀車轆爆個波
另一校友入境事務主任協會前主席倪錫水本身係入境處足球隊成員，佢笑話一踢膠波仔回憶返晒嚟，記得當年小息即刻攞波衝落操場霸位，經常錯腳將個波踢出馬路，畀車轆爆咗又要再買過。雖然伍華仔都愛踢膠波仔，但佢話七八十年代讀書先係最重要，冇乜人會做到職業運動員，近年先有師弟踢港超聯，嘆時代變了。
至於一九七二年畢業、全場人嘅「大師兄」、立法會前議員李華明就擔任講波佬，一開口就彈多過讚，話師兄隊係拉雜成軍，大家無默契，仲有好多傷兵上陣，多次暗示現役校隊「放水」。立法會醫學界議員陳沛然成日話自己正職係足球員，佢由頭帶到尾，多次中途攔波過場，扭花扭到出神入化，佢直言因為膠波仔先展開咗佢嘅足球生涯。
卓妮