中環出更：趕絕立會睡魔陳維安靠晒學生哥
睡魔急Call相信無論係上緊堂嘅學生哥，抑或係喺立法會開緊會嘅議員都試過，部分議員更係被拍攝到開會瞓覺嘅「常客」。尋日一個科學比賽中，有學生就研究空氣品質點樣令人不自控瞓着，仲吸引到立法會秘書長陳維安（Kenneth）話要引入立法會會議廳添！
尋日一個香港學生科學比賽喺科學園舉行決賽，比賽分初中組同高中組。擔任評審嘅Kenneth對喺高中組取得冠軍嘅研究項目印象好深刻，佢話因為該項目題材嘅靈感係來自同學成日瞌眼瞓，所以就研究點樣改善班房二氧化碳含量高嘅問題。Kenneth認為個項目研究係原創，學生參與度高，所以值得攞冠軍。咁佢以前上堂有冇「釣魚」呢？點知佢就冇答，淨係笑住反問係咪要改善立法會會議廳先喎。
陳浩然：性別與科學頭腦無關
一般人可能認為男仔較擅長理科，不過今次參賽嘅就以女學生較多。出任高中組評審團主席嘅香港中文大學生命科學學院教授陳浩然認為，性別與科學頭腦無關，最重要係有好老師教導。對於唔少人覺得讀科學會比較難搵工，佢就話，讀科學係講求科學精神，呢種精準思維對唔同行業都有幫助，所以唔使擔心畢業等於失業咁話。
科學館署理館長楊明思、香港青年協會副總幹事魏遠強都係評審。楊在場大玩初中生發明嘅一款手套，該手套特別之處係只要戴住時郁動手指，就可以喺連接咗嘅電子產品中奏出音樂，所以楊都大讚該手套容易控制又方便。講起科學館嘅展品經常被批評過時，楊就話，依家會搞STEM教育，亦會邀請機構合辦活動，會不時創新同追趕科技發展喎。
卓妮