港鐵雖然故障頻生，不時出現延誤，不過依然連年加價，港鐵票價可加可減機制多年來都被批評係「只加不減」。港鐵之前宣布將會加價百分之三點三，立法會交通事務委員會尋日就討論港鐵加價事宜，與會嘅蘇偉文應該如坐針氈喇，事關政府及港鐵又再被議員圍插。有議員就指出，港鐵二○一○年起連續九年加價，鬧爆政府係包庇港鐵成為「吸血鬼」嘅元兇，亦有議員質疑政府今年初推行交通補貼計劃，根本就係畀錢市民去補貼港鐵。以納稅人嘅血汗錢滋養「吸血鬼」，政府唔係包庇，又係咩呢？
