政情：成功為自己爭取權益 羅致光五一放大假
下周三係五一勞動節，雖然當日係勞工假期，但都未必個個打工仔都可以喺當日放假。之不過，勞工及福利局局長羅致光當日就一定可以放假喇，事關根據政府憲報，羅致光將會喺勞動節開始放大假。其實羅都幾注重工作與生活嘅平衡，佢上任局長冇耐都已經講過自己最遲傍晚六點幾就會放工返屋企食飯，再睇吓電視，依家又成功為自己爭取到勞動節唔勞動。如果佢都咁積極幫打工仔女爭取工作同生活平衡就好喇。
根據尋日憲報，羅致光將會由五月一日起開始休假，直到五月七日先至復工，放假放足六日。而佢休假期間，勞福局副局長徐英偉就會兼任埋局長一職。
其實每年五一勞動節都有唔少工會舉辦遊行示威表達各種勞工訴求，爭取權益。羅致光作為勞福局之首，唔現身聆聽訴求之餘，仲要走咗去放大假，唔通佢唔怕畀打工仔質疑佢自己嘅勞工權益就落力爭取，但市民嘅勞工權益就闊佬懶理？