政情：張宇人呻會議撞時間 盧偉國：資深點會唔慣
尋日朝早立法會同時舉行三個會議，其中工務小組委員會更係加開嘅會議，結果就惹嚟議員微言，工務小組委員會主席盧偉國（WK）就施展神回應，話立法會唔止有會議廳，仲有會議室一、二同三咁話。究竟同「撞會」有乜嘢關係呢？
唔少議員都要出出入入投票
話說尋日立法會工務小組委員會、交通事務委員會同支援癌症病患者事宜小組委員會同時舉行會議，其中工務小組嘅會議就要進行多次表決，唔少議員都要出出入入會議室投票。由於會上第一次表決鐘響係為處理議員提出嘅臨時動議，唔少議員都由隔籬會議室過嚟參與表決，飲食界議員張宇人（Tommy）就話同時間有幾個會議進行緊，問到底有幾多項臨時動議要處理。
點知WK就話，立法會唔止有會議廳，仲有會議室一、二同三，其中會議室二仲可以一分為二添。原來佢意思係立法會同時舉行多個會議並唔出奇，議員都習慣走嚟走去喇。不過Tommy就話自己唔習慣，WK隨即反駁，話Tommy咁資深點會唔慣，仲揶揄佢太謙虛，重申最近立法會事務多，所以較多會議要開。話時話，其實Tommy都有番咁上下「分量」，多啲郁動下都好嘅。