日前喺銅鑼灣見到教育局前局長孫明揚（孫公）太太孫鍾小芬喺一個商場內行色匆匆，好似搵緊乜嘢咁。上前一問， 原來屋企電視遙控器壞咗，佢要去電器品牌店配番。唔通依家孫公退休賦閒在家，電視機已成為佢好重要嘅夥伴？孫太笑笑口話唔係，係佢自己好鍾意睇電視就真。鍾意到乜嘢地步呢？佢話屋企唔淨止客廳同睡房有電視機，連廚房都有添！吓？咁即係好鍾意煲劇？佢未趕得切回答，一見有升降機到就急急腳上樓，睇嚟真係冇電視睇就好唔安樂喇！
