中環出更：梁耀忠請「貼身公關」轉形象？
近年不斷被炮轟做「逃兵」嘅立法會議員梁耀忠（阿忠）醜聞纏身，其領導嘅街坊工友服務處（街工）早前更大地震爆退黨潮，形象認真麻麻。不過，阿忠尋日喺社交網站發貼請助理，專責做傳訊同議會事務，主要工作差唔多係做佢嘅貼身公關，唔通想轉形象？
需管理Fb專頁 參加遊行
根據貼文，呢位助理要有大學程度，應屆畢業生都可以，但要認同兼了解街工理念，對公共政策有基本認識等。主要負責管理Facebook專頁、聯絡傳媒、安排記招、寫新聞稿、陪議員開會、參加遊行、寫講稿等。就咁睇，幾乎等於佢嘅貼身助理一樣。
前助理離職 搵人接手
不過阿忠提供福利都唔差，同公務員一樣每周工作四十四小時，另有十四天年假、十四周全薪產假、三周全薪侍產假、月事假、生日假等。問到係咪為改形象請人？阿忠笑話唔係，一向都有呢個位，之前同事有更好前程，所以依家要請人接手啫！點都好，正所謂「做人最緊要有公關」，請個叻嘅人或會扭轉乾坤。
卓妮